WHAKATERE

Ngā Au

Whakarongo ki te karakia i tukua e Nukutawhiti i tōna terenga mai ki Aotearoa, ki Hokianga-nui-a-Kupe.

E kau ki te tai e

E kau ki te tai e, e kau ki te tai e,

E kau rā, e Tāne.

Wāhia atu rā te ngaru hukahuka o Marerei-ao

Pikitia atu te aurere kura o Taotao-rangi.

Tapatapa ruru ana te kakau o te hoe,

E auheke ana, e tara tutu ana te huka o Tangaroa

I te puhi whatukura, i te puhi marei kura o taku waka.

Ka titiro iho au ki te pae o uta, ki te pae o waho.

Piki tū rangi ana te kakau o te hoe;

Kumea te uru o taku waka

Ki runga ki te kiri waiwai o Papa-tū-ā-nuku

E takoto mai nei; Ki runga ki te uru tapu nui o Tāne

E tū mai nei. Whatiwhati rua ana te hoe a Pou-poto,

Tau ake ki te hoe nā Kura, he ariki whatu manawa.

Tō manawa, e Kura, ki taku manawa;

Ka irihia, ka irihia ki Wai-o-nuku,

Ka irihia, ka irihia ki Wai-o-rangi,

Ka whiti au ki te whei ao, ki te ao mārama.

Tupu kerekere, tupu wanawana

Ka hara mai te toki

E Haumi e Hui e Tāiki e!

Ngā Hau

Neke atu i te 800 ngā momo hau i mōhiotia e ō tātou tūpuna. Whakarongo ki te karakia e kōrero ana mō ētahi o ēnei momo hau.

Kia rongo mai koe,

Hau ruhi, Hau ruhi

Hau ngenge, hau ngenge,

Hau tukitukia,

Hau e pū mai nā,

Ka whanatu au ka piki i a koe nā,

Ka whanatu au ka raka i a koe nā,

Koia nā whiwhinga,

Koia nā rawea,

Koia nā rawenga,

Koia nā purutia,

Koia nā tawhia,

Koia nā whakarotua,

Rotua te wai kia rotua,

Rotua te moana kia rotua,

Rotua te rawa uta,

Pikitia te moana,

Te nui tarawa tai,

Tuku atu au kia rere ā-manu Tū

Tū ki runga, tū ki raro

Tū ki wheawhea

Tū kia whakaputaina

Ki te wheao

Ki te ao mārama